Ургамалтай эелдгээр ярих нь тэдний өсөлтөд эергээр нөлөөлдөг гэж та урьд нь сонсож байсан уу. Энэ нь үгийн утгаас илүүтэйгээр дууны чичиргээ болон дууны түвшинтэй холбоотой ажээ. Дууны чичиргээ нь ургамалд салхи шиг, байгальд байгаа мэт орчныг бүрдүүлж, ургамлын бүтцийг бэхжүүлдэг гэнэ. Уг үзэгдлийг шинжлэх ухааны үндэслэлтэй тайлбарлая.
Ургамал нам түвшний дууны чичиргээнд эергээр хариу үзүүлдэг байна. Учир нь, дууны 115–250 герц орчим давтамж нь ургамлын өсөлтийг хамгийн сайн дэмждэг. Энэ нь хурц биш, намуухан, тогтвортой чичиргээтэй дуу хоолой гэсэн үг юм.
Түүнчлэн энгийн, тайван, зөөлөн ярианы өнгө, дууны долгион нь ургамлын өсөлтийг идэвхжүүлдэг генийг ч өдөөдөг байна. Зарим судалгаанаас үзвэл зөөлөн чичиргээ нь салхи зэрэг байгалийн орчны нөлөөг дуурайж, ургамлын бүтцийг бэхжүүлж, физиологийн өөрчлөлтийг дэмждэг аж.
Мөн ургамалтай ярьж байх үед бид өөрийн мэдэлгүй нүүрсхүчлийн хий ялгаруулдаг. Энэ хий нь фотосинтез болон ургамлын өсөлтөд шаардлагатай чухал элемент болж өгдөг юм.
Зарим хүмүүс ургамлыг зөвхөн биологийн амьд биетээс гадна орчны энерги, хүний хандлагад мэдрэмтгий гэж үздэг. Мөн ургамалтай тайван, эелдгээр харьцах нь зөвхөн ургамалд төдийгүй хүний өөрийн сэтгэлзүйд ч эерэг нөлөө үзүүлдэг гэж тайлбарлах нь бий. Харин ууртай, ширүүн орчин нь хүнд ч, амьтанд ч, ургамалд ч дарамттай энерги үүсгэдэг байх магадлалтай.
Зарим соёлд ургамал нь хүний энергийг шингээж, гэрийн уур амьсгалыг мэдэрч, сөрөг энергийг цэвэрлэдэг гэж үздэг. Ялангуяа буддизм, бөө мөргөл, дорнын сүнслэг соёлд “бүх зүйл энерги агуулдаг” гэсэн ойлголт нийтлэг байдаг. Тиймээс ургамалтай тайван ярьж, анхаарал тавих нь ургамалд ч, хүнд ч тайвшрал өгдөг байх нь.
