Улаанбаатар хотын унд, ахуйн ус хангамжийг шийдвэрлэх зорилготой “Туул усан цогцолбор” төслийн ТЭЗҮ боловсруулалт 90 гаруй хувьтай байна. Төслийн ТЭЗҮ-ийг БНЭУ-ын “Kalpataru Projects International” ХХК хийж гүйцэтгэж байгаа юм.
Урьдчилсан байдлаар тус цогцолбор нь усан сан, ус дамжуулах шугам сүлжээ, цэвэршүүлэх байгууламжаас бүрдэх бөгөөд нийт 5569 га талбайг хамарна. Тус цогцолбор нь 50–100 сая шоо метр ус нөөцлөх хүчин чадалтай юм.
Нийслэлийн усны хэрэглээ жилээс жилд өсөж, газрын доорх усанд тулгуурласан өнөөгийн хангамж урт хугацаандаа эрсдэл үүсэхээр байгаа. Иймд гадаргын усанд тулгуурласан шинэ эх үүсвэр бий болгох шаардлага үүсээд байгаа юм.
“Туул усан цогцолбор” төсөл нь Улаанбаатар хотын 2040 он хүртэлх хөгжлийн ерөнхий төлөвлөгөө, “Алсын хараа-2050” бодлогын баримт бичигт тусгагдсан усны аюулгүй байдлыг хангах чухал төслүүдийн нэг. Тус төслийг 2026-2033 онд хэрэгжүүлнэ.
