НҮБ-ын Цөлжилттэй тэмцэх конвенцын Талуудын бага хурлын 17 дугаар чуулган (UNCCD COP17) Улаанбаатар хотноо эхлээд буй. Чуулганы хэлэлцэх асуудлын дарааллыг батлахдаа жендэр, иргэний нийгмийн оролцоо болон Риогийн гурван конвенцын уялдаа холбооны асуудлыг тусгаагүйд Иргэний нийгмийн байгууллагуудын зөвлөл (CSO Panel) гүнээ түгшиж буйгаа илэрхийлэв.
Газрын доройтол, цөлжилт, ган, зудын сорилттой өдөр тутам нүүр тулж буй орон нутгийн иргэд, уугуул ард түмэн, тариаланчид, малчид, эмэгтэйчүүд, залуучууд, судлаачид болон иргэний нийгмийн байгууллагууд бодит мэдлэг, хуримтлуулсан туршлага, хэрэгжиж буй шийдлүүдийг COP17-ын үйл явцад авчирдаг. Тэдний оролцоогүйгээр бодит үйл ажиллагаа, үр дүнтэй хэрэгжилтийг хангах боломжгүйг зөвлөл онцоллоо.
Иргэний нийгмийн оролцоо, жендэр болон Риогийн гурван конвенцын уялдааг хэлэлцэх асуудлын дарааллаас хассан нь хүртээмжтэй, оролцоонд суурилсан үйл явцыг сулруулж, газар дээрх хэрэгжилтийг сааруулах эрсдэлтэй гэж тус зөвлөл үзэж байна.
“Өнөө үеийн өмнө тулгарч буй хамгийн том сорилтыг нэг байгууллага, нэг эрдэмтэн, нэг хэлэлцээ хийгч, нэг улс дангаараа шийдвэрлэх боломжгүй. Бидэнд хамтын хүч, хамтын оролцоо хэрэгтэй” хэмээн иргэний нийгмийн төлөөлөл мэдэгдэв.
#COP17 Mongolia
Байгаль орчин, уур амьсгалын өөрчлөлтийн яам
#MongolianEconomy #UNCCDCOP17 #COP17Mongolia #иргэнийнийгэм #жендэрийнэрхтэгшбайдал #ЦөлжилттэйТэмцэх #газрындоройтол #газраасэргээе #хамтыноролцоо
