“Эгүүр Ньюс” агентлаг, найруулагч Э.Ган-Очирын хамтран бүтээсэн “Их говийн манаач” баримтат кино анхдагч экосистемийг шинжлэх ухаан, дүрслэлийн өндөр түвшинд харуулж, уур амьсгалын өөрчлөлтийн эсрэг дуу хоолой болсон тул Болгарын “Алтан феми” кино наадмаас “Алтан Мазаалай” шагнал хүртэхээр болжээ. Энэ жил тус наадамд дэлхийн 130 орны 9600 гаруй бүтээл өрсөлдсөн байна.
“Их говийн манаач” кинонд Их говийн дархан цаазат газрын экосистем, тэр дундаа нэн ховор мазаалай баавгайн амьдрах орчин, түүнийг хамгаалан үлдээхээр тэмцэж буй байгаль хамгаалагч, эрдэмтдийн тэмцлийг харуулдаг.
Мазаалай нь зундаа +46 хэм халж, өвөлдөө -34 хэм хүйтрэх байгаль цаг агаарын эрс тэс уур амьсгал бүхий говь цөлийн экологийн хүнд нөхцөлд амьдардаг цорын ганц хүрэн баавгай гэдгээрээ онцлог. Сүүлийн үеийн судалгаагаар дэлхий дээр зөвхөн Монголын говиор нутагтай энэ амьтны тоо толгой ердөө 50 орчим бүртгэгдсэн.
Кино багийнхан нэг жилийн хугацаанд 10 гаруй удаа хүн амьдардаггүй Говийн их дархан цаазат газрыг зорьсны эцэст мазаалай баавгайн гурван минутын үнэ цэнтэй дүрсийг хальсанд буулгаж чадсан байна.
“Их говийн манаач” баримтат кино 2025 оны арванхоёрдугаар сард нээлтээ хийсэн бөгөөд өнгөрсөн сард БНСУ-ын Пусаны кино наадмыг нээж байсан билээ. Киног Байгаль орчин, уур амьсгалын яамны өөрчлөлтийн яамны захиалгаар бүтээж продюсероор “Эгүүр Ньюс” агентлагийн эрхлэгч Ж.Мядагбадам, зохиолчоор залуу сэтгүүлч М.Тэнгис ажиллажээ.
Болгарын Софи хотноо зохион байгуулдаг “Алтан феми” кино наадамд Монгол Улсаас найман бүтээл оролцсоноос найруулагч Э.Ган-Очирын “Их говийн манаач”, найруулагч Г.Бямбасүрэнгийн “Хувь заяа”, найруулагч Т.Алтанхуягийн “Хөх тавилан”, найруулагч Д.Галбаярын “Эмэгтэйн кэйс” гэсэн дөрвөн бүтээл тус тусын ангилалд шагнал хүртэхээр шалгарсан байна.
