Уучлаарай, та баримтаа аваарай…
Хаяж чадахгүй явсаар халаас, цүнхний нэг хэсэг болдог энэ жижиг цаас бидний эрүүл мэндэд ямар том нөлөө үзүүлдгийг та мэдэх үү?
Дулааны аргаар хэвлэдэг баримт буюу бидний нэрлэдэгээр НӨАТ-ын баримтад BPA гэх химийн бодис агуулагддаг. Энэхүү бодис нь цаасны гадаргуу дээр хэвлэх процессыг дэмждэг байна. Хэрэв та өөрт байгаа баримт дээрээ хумсаар, эсвэл өөр үзүүртэй зүйлээр зурахад зурсан мөрөөр саарал мөр үүсэж байвал энэ нь дээрх бодисыг агуулсан гэдгийг илтгэнэ. Эдгээр бодисын хүний биед нэвтрэх чанар бусад химийн бодистой харьцуулахад нэлээд өндөр бөгөөд баримтыг ердөө 5-10 секунд барихад л арьсаар дамжин биед шингэж эхэлдэг байна. Арьсаар нэвчсэн бодис цусанд шууд ордохоос гадна биеэс гадагшлах хугацаа нь илүү удаан байдаг.
BPA (бисфенол А) гэдэг нэршил бидний дунд төдийлөн танил биш боловч энэхүү бодист олон удаа өртөх нь дааврын систем, нөхөн үржихүйн асуудалд хүргээд зогсохгүй хорт хавдрын эрсдэлийг нэмэгдүүлдэг. Стэнфордын их сургуулийн судалгаагаар цусан дахь BPA түвшин өндөртэй жирэмсэн эмэгтэйчүүдийн үр зулбах эрсдэл энгийн түвшинтэй эмэгтэйчүүдээс 83 хувиар илүү байдгийг тогтоожээ. Түүгээр ч зогсохгүй түрүү булчирхайн хорт хавдрын эрсдэлийг 30-40 хувиар нэмэгдүүлдэг байна.
НӨАТ-ын цаас нь химийн найрлагатай, дахин боловсруулахад тохиромжгүй учир ихэвчлэн хог хаягдал болон булшлагддаг. Монгол Улсад гэхэд л сард дунджаар 30 гаруй сая гаруй баримт хогийн цэгт очдог. Ийнхүү НӨАТ-ын баримт нь хүний арьсанд шууд хүрэлцэн эрсдэл үүсгэхээс гадна байгальд задралгүй үлдэж, экосистемийг бохирдуулаад зогсохгүй, хөрс усанд нэвчсэнээр эргэн хүнсний сүлжээнд орж ирэх боломжтой. Хэдийгээр НӨАТ-ын бүртгэлийг цахимжуулж байна гэдэг ч бодит байдал дээр хэрэгжүүлдэг газар гарын арван хуруунаас хэтрэхгүй хэвээр л байна.
Бидний өдөр тутмын хэрэглээний нэг хэсэг болсон энэ жижиг цаасны ард нуугдах эрүүл мэнд, экологийн үнэ цэн хэдээр хэмжигдэх вэ?
