“COP-17-д сэтгүүлчдийн оролцоо” өглөөний уулзалт өнөөдөр (2026.05.08) боллоо.
Цөлжилттэй тэмцэх тухай НҮБ-ын конвенцын талуудын 17 дугаар бага хурал (COP17) ирэх наймдугаар сарын 17-28-нд Улаанбаатар хотод зохион байгуулагдана. Тус хурлыг зохион байгуулах ажлын алба “Конрад-Аденауэр сан”-тай хамтран “COP-17-д сэтгүүлчдийн оролцоо” өглөөний уулзалтыг хоёр долоо хоног тутамд зохион байгуулах юм.
Энэ удаагийн уулзалт хоёр дахь удаагийнх бөгөөд бага хурлын барилга байгууламж, логистикийн бэлтгэл ажлын талаар голчлон мэдээлэл өгсөн юм.
COP-17-г зохион байгуулах хүрээнд 12 дэд хороо байгуулагдсан. Тэдний нэг Зам, тээвэр, логистикийн дэд хороо нийт долоон зорилтын хүрээнд 106 ажил төлөвлөжээ. Тухайлбал, олон улсын нисэх онгоц, галт тэрэг, газрын хилээр нэвтэрч буй хурлын оролцогчдыг саадгүй нэвтрүүлэх, хүлээн авах, аюулгүй түргэн шуурхай тээвэрлэх, тээврийн хэрэгслүүдийн сонголтыг олшруулах, аж ахуйн нэгжүүдтэй хамтран ажиллах, зам арчлалт, замын хөдөлгөөний зохицуулалт хийх, оролцогчдыг тээвэр, логистикийн мэдээллээр хангах зэрэг ажил багтаж байна.
Мөн 12 дэд хорооны нэг нь Байр, барилга байгууламжийн дэд хороо. Тус дэд хороо нь бага хурлын үйл ажиллагааг зохион байгуулахад шаардлагатай дэд бүтцийг бэлтгэх ажлыг хангаж, шаардлагад нийцэх тохиромжтой байр, барилга байгууламжийг сонгох, цахилгаан, интернэт, аудио, видео тоног төхөөрөмж, хуралдааны өрөөний зохион байгуулалт зэрэг дэд бүтцийг хүлээн авагч улсын хэлэлцээр, хавсралтад туссан шаардлагын дагуу хангах, зохицуулалтыг хийх зэрэг үүрэг хүлээдэг.
Өнөөдрийн байдлаар загвар зураг, төсөв боловсруулах, гадна инженерийн шугам сүлжээний ажил, ус хангамж, ариутгах татуурга, усалгааны систем, цахилгаан хангамж, гадна холбоо, авто зам, зогсоолын зураг, хурлын байр, барилга байгууламжийн техник, эдийн засгийн үндэслэл боловсруулах зэрэг эхний ээлжийн ажлууд 100 хувийн гүйцэтгэлтэй байгаа аж. Мөн бага хурал болох барилгыг Үндэсний цэцэрлэгт хүрээлэнд нийт 80.000 м2 барилгажилтын талбай бүхий 10 мянга хүртэлх зочин хүлээн авах хүчин чадалтай, эко, байгальд ээлтэй шийдлээр бүтээн байгуулахаар төлөвлөжээ.
Нэмэлт мэдээлэл өгөхөд, бага хурал зохион байгуулагдах орчныг цэнхэр болон ногоон гэсэн хоёр бүсэд хуваана. Цэнхэр бүсэд орсон хүн ногоон бүс рүү чөлөөтэй зорчиж болох бол ногоон бүс иргэдэд нээлттэй байхаараа онцлог.
Цэнхэр бүс нь СОР-17 хурлын олон улсын хэлэлцээ, хамтын ажиллагааны үндсэн орон зай болно. Энэ нь:
- Хоёр талт болон олон талт хэлэлцээ
- Засгийн газар, удирдагчидтай шууд харилцах боломж
- Бодлогын яриа хэлэлцээ, дэлхийн амлалт, олон улсын уриалга
- Нөлөөлөл, итгэлцэл, оролцооны талбар байх юм.
Цэнхэр бүсийн оролцогчдын бүртгэл 2026 оны тавдугаар сарын 1-нд нээгдсэн бөгөөд дэлгэрэнгүй мэдээллийг эндээс авах боломжтой.
Ногоон бүс нь СОР17 хурлын олон нийтэд чиглэсэн дипломат харилцаа, инновацын орон зай юм. Ногоон бүсэд:
- Олон нийтэд нээлттэй дипломат харилцааны орон зай
- Технологи, төсөл, шийдлүүдийг танилцуулах
- Залуучууд, эмэгтэйчүүд, олон нийт, иргэний нийгмийн оролцоог дэмжих
- Мэдлэг түгээх, олон нийтэд хүрэх, таниулах үйл ажиллагаа явагдана.
