Манай улсад ургамал, ой судлаач, аграномич гэх зэрэг мэргэжилтэн бэлддэг бол Тайванийн их дээд сургуулиуд ойн эмч, ургамлын эмч гэсэн мэргэжлээр хүмүүсийг сургаж гаргадаг байна. Элс цөлтэй хөрсөн дээрээ 60-80 градус хүртэл халдаг газар нутгуудад ажиллаж амжилттай мод тарьж ургуулсан хатагтай Чэн Ли И манай оронд энэ намар ирж мод тарихдаа өгсөн зөвлөгөөнөөс хүргэж байна.
1. Мод тарих орчноо заавал хашаалах хэрэгтэй. Хашаа хийхгүйгээр мод таривал амжилттай ургахгүй.
2. Говийн нөхцөлд шуудуу ухаж мод тарих нь зүйтэй. Ингэснээр борооны усыг шуудуундаа хуримтлуулах боломж бүрдэнэ.
3. Бороо орж байх үед мод таривал амьдрах чадвар нь илүү нэмэгддэг.
4. Хур тунадасны хэмжээний өнгөрсөн хугацааны түүхийг мэдэх нь мод тарьж ургуулахад чухал ач холбогдолтой.
5. Нэг төрлийн модыг нэг дор тарьдаггүй. Нэг төрөл зүйлээс бүрдсэн ой галд шатах, хортон шавжид өртөх нь амархан байдаг.
6. Модны эргэн тойронд байгаа өвс ургамлыг зулгаах хэрэггүй. Хэрвээ модны суулгацаас өндөр түвшинд очоод нарыг нь хаагаад байвал өвс ургамлыг тайрна. Түүнээс биш үндсээр нь сугалдаггүй
Түүнчлэн “Тухайн модны тогоон доторх чийгийг нь зэрлэг ургамал хадгалдаг. Гэтэл Монголд эдгээр өвс ургамлыг зулгааж хаях хандлага их ажиглагддаг. Энэ нь буруу зүйл юм.
Модыг дагаад өвс ургамал ургаж байдаг. Жишээлбэл Баянхонгорт очоод шороо, чулуутай хөрсөнд мод тарьсны дараа эргэн тойронд нь зөндөө олон ургамал ургачихсан байсан. Цөлжилтийг бууруулж ногоон байгууламжтай болох гэж байгаа бол зэрлэг ургамлыг бас давхар ургуулах нь зөв юм шүү.
Монголд жил бүрийн тавдугаар сарын сүүлээр шууд үндэстэйгээр нь авчраад суулгадаг аргыг хэрэглэж байна. Гэтэл Монголын борооны улирал нь миний ажигласнаар долдугаар сар. Борогтой модыг олноор бэлтгэж гаргаад, зургаа, долдугаар сарыг сонговол олон модыг борооны улиралд амжилттай тарьж чадна” хэмээн зөвлөжээ.
